«Астана Моторс» Алматының Индустриялық аймағында қытайлық Chery, Haval және Changan автогиганттарының автомобильдерін өндіруге арналған толық циклді мультибрендті зауыт салуға кірісті.

Қазақстан Президенті Қасым-Жомарт Тоқаев Алматыға ресми сапары аясында кәсіпорынның құрылысын бастауға рұқсат берді.

Зауыт құрылысын іске қосу рәсіміне Алматы қаласының әкімі Ерболат Досаев; «Астана Моторс» Басқарма Төрағасы Нұрлан Смағұлов; «Астана Моторс» бас директоры Бекнұр Несіпбаев және басқа да ресми тұлғалар қатысты.

«Бұл жоба елімізге өте қажет. Сондықтан тәуекел дейміз. Зауыттың жұмысына сәттілік тілеймін. Қытай Төрағасы Си Цзиньпин мырза биыл Қазақстанға келген кезінде келіссөз жүргіздік. Соның ішінде осы жоба туралы да әңгімелестік. Нәтижесінде, міне, бұл жоба іске асырыла бастады. Құтты болсын!» — деді Президент.

Мультибрендті зауыттың өндірістік қуаты — жылына 90 мың бірлік. Кәсіпорындағы автомобильдердің барлық көлемі тек шанақты дәнекерлеу және бояу арқылы ұсақ түйінді әдіспен шығарылатын болады.

Өндірілген автокөліктердің жалпы көлемінің 40%-ын «Астана Моторс» отандық нарыққа, 60%-ын — ТМД елдеріне экспорттауды жоспарлап отыр.

«Астана Моторс» компаниясы адами капиталды дамытуға басты назар аударады және машина жасау саласында білікті кадрларды тәрбиелейді.

«Мультибрендті зауытта 2 200 жұмыс орны құрылады. Ұжымның негізгі тірегі - инженерлік-техникалық мамандықтардың мамандары, олар жетекші автоконцерндердің тәжірибесін қабылдап, Қазақстанда технологияларды дамытатын болады. Біз Қытайдың автоөнеркәсіп көшбасшыларының стандарттары бойынша өндірісті ұйымдастыруға 100 млрд. теңге инвестициялаймыз. Біздің жаһандық мақсатымыз — Алматының Индустриялық аймағында технопарк салу, компоненттерді өндіріп, оларды кәсіпорындарымыздың желісіне жеткізетін шағын және орта бизнеске арналған кластер құру», — деп атап өтті «Астана Моторс» Басқарма Төрағасы Нұрлан Смағұлов.

«Астана Моторс» СЕО Бекнұр Несіпбаев, өз кезегінде, келесіні атап өтті: «жаңа кәсіпорын Chery, Haval және Changan брендтерінің тоғыз моделін өмірлік циклінің басында - буын ауысқан кезде немесе толық рестайлинг кезінде шығарады, яғни модельдердің әлемдік нарыққа шығуына қарай олардың өндірісін игереді". Атап айтқанда, әңгіме Chery Tiggo 2 PRO, Chery Tiggo 4 PRO, Chery Tiggo 7 PRO; Haval Jolion, Haval Н6, Haval M6 Plus; Changan CS35, Changan CS55 және Changan CS75 сияқты модельдер жайлы болып тұр.

Мультибрендті зауыттың құрылысын аяқтаудың жоспарланған күні - 2024 жылғы IV тоқсан. 2025 жылдың I тоқсанында автомобильдердің пилоттық өндірісін іске қосу жоспарлануда.

Лицензиялық келісім бойынша автомобиль шығаратын кәсіпорын «Астана Моторс» компаниясының 100% меншігінде.

Естеріңізге сала кетейік, «Астана Моторс» компаниясы жергіліктендіруді кезең-кезеңімен тереңдетіп келеді және ағымдағы жылы автокомпоненттер шығаратын зауыт салуға кіріседі. Алматының Индустриялық аймағында технопарк құру Қазақстанда шағын және орта бизнестің дамуына, машина жасау саласында білікті кадрлар жүйесін қалыптастыруға серпін береді.