Нұрлан Смағұлов СОО иелерін Алматы мен Астана ТЖД-мен меморандумға қол қоюға шақырды

Бұл туралы Astana Group басшысы MEGA Alma-Ata СОО-да өткен өрт қауіпсіздігіне арналған брифинг барысында хабарлады. Ол еліміздің өзге де сауда ойын-сауық орталықтарын меморандумға қосылуға шақырды.

Кемероводағы «Зимняя вишня» сауда орталығындағы қайғылы оқиғадан кейін қазақстандықтар өрт қауіпсіздігіне байланысты алаңдаушылығын білдірді. Осыған қатысты сауалдарға MEGA СОО желісінің мамандары алғашқы болып жауап берді. Жауап беруден бөлек, сауда ойын-сауық орталықтарының келушілері өздерін қауіпсіз сезінуі үшін мамандар қосымша шара қолдануға дайын екендігін көрсетті. Компания жетекшісі Нұрлан Смағұлов Алматы мен Астана Төтенше жағдайлар департаменттерімен желіге кіретін барлық СОО-нда жоспардан тыс тексеріс өткізу туралы меморандумға қол қоюға бастамашылық жасады. Қазіргі таңда заңнамаға сай мұндай тексерістер жылына бір рет өткізіледі.

Біз сауда ойын-сауық орталықтарын жылына бір рет тексеру жеткіліксіз деп санаймыз. Осыған орай, Алматы мен Астана Төтенше жағдайлар департаменттерімен біздің СОО-рын жоспардан тыс тексеру туралы меморандумға қол қойғымыз келеді. Халықтың бізге деген сенімінің артуы үшін, заңнамалық тәртіптің шектеулеріне қарамастан ТЖД өкілдерінің кез келген уақытта келіп, тексеру шараларын өткізуі үшін мен Алматы және Астана қалалары мен облыс орталықтарында орналасқан басқа да сауда орталықтарының иелерін осы меморандумға қосылуға шақырамын, — деді Нұрлан Смағұлов.

Өрт қауіпсіздігіне арналған брифингке қаланың көптеген журналистері мен блогерлері келді. Қоғамдық тыңдауға ұқсаған жиында әрбір адам өз пікірін білдіріп, MEGA СОО желісінің жетекшілігі өрт қауіпсіздігі бойынша жұмыстарды ары қарай жалғастыру мен олқылықтар пайда болған жағдайда оларды түзетуге уәде берді.

Біз өрт қауіпсіздігі бойынша барлық жүйелеріміздің 100% жұмыс істеп тұрғанын білеміз. Алайда орын алған оқиға осы жүйені бұдан да мұқият тексеруге мәжбүр етті. Біз бұл жұмысты міндетті түрде жүргізіп отырамыз, — деп көрсетті MEGA СОО желісінің бас директоры Сейітжан Есмағамбетов.

MEGA сауда орталықтарының әрқайсысында өртке қарсы қорғаныс шараларының толық кешені қарастырылған: мұнда өрт хабарлағышы, хабарлаудың автоматты жүйесі, өрт сөндірудің бірнеше жүйесі, түтінді жою жүйелері, эвакуациялық шығу есіктері мен баспалдақтар, тәулік бойы қызмет атқаратын өртке қарсы жеке бөлімдері мен өрт сөндіру машиналары бар. Барлық жүйелер күн сайын тексеріліп, айына бір рет ТЖД мамандарының қатысуымен өртке қарсы оқу-жаттығулары өтеді.